زلفون داغلاماق عادتیدر، شانه نیله سین؟

یارین وفاسی اولماسا ، بیگانه نیله سین ؟

پروانه عشقی وار ، دولانیر شمع باشینا ،

شمع ایسه یاندیریر ،اونی پروانه نیله سین؟

زلفونده ناله ائیله سه اینجیتمه کونلومی،

زنجیره تاب قیلماسا ، دیوانه نیله سین ؟

معشوقین ئوزگه لره گزیر ،اومما خلق دن

بیر،ائو کی؛گئتدی غارته،هم خانه نیله سین؟

گل غنچه لیقدان ، عادت ائدیب بی وفالیقی

دونمیشسه بلبلین،اورگی قانه نیله سین ؟

ییخدی رقیب کونلوم ائوین،وصل یار ایچون

دشمن منم بو ظالمه کاشانه نیله سین ؟

میخانه نین شرافتینی ،آنلا باده ایچ

سر خوشلیق ائیلدین ،بونا میخانه نیله سین؟

سئندیر طبیعتینده اولان ،جهل شیشه سین

سئندیرما مست اولان کیمی ، پیمانه نیله سین؟

((واحد))دئییرسه خلقه حکیمانه باده ایچ

همدم فساد اولاندا ، حکیمانه نیله سین ؟

بیر گول عشقینده کؤنول قان اولاجاقمیش نه بیلیم!

بولبول آسا ایشیم افغـان اولاجـاقمیـش نـه بیلیـم!

وصلینی سئومه ز ایدیم، هیجر غمین بیلسـه ایـدیـم

قسمتیم آخیری، هیجران اولاجاقمیش نـه بیلیـم!

بـو قـدر عشـق اودونـا یـانمـاز ایـدیـم عــالمــده

جیگریم هیجرله سوزان اولاجـاقمیـش نـه بیلیـم!

خـانـهٔ کـؤنلـومـو ییخـدیـن بـو ستـم داشـی ایلــه

مولکِ دل بیر بئله ویـران اولاجـاقمیـش نـه بیلیـم!

یار نظر ائتمیش ایدی، بوسه وئریـب، جـانیـم آلا

او جفـاپیشـه پئشیمـان اولاجـاقمیـش نــه بیلیــم!

کـؤنلـومـو خـالینـا بنـد ائتـدی زنخــدان ایچــره

یـوسیفیـم بستـهٔ زنـدان اولاجـاقمیـش نـه بیلیــم!

واحد، اول ماه روخون زولفونه دل وئرمـه ز ایـدیـم

خاطریم بؤیله پـریشـان اولاجـاقمیـش، نـه بیلیـم!

علی آقا واحد

بوتون گوزللیگی تانریم او سرو نازه وئریب

او هر نه ائتسه طبیعت اونا ایجازه وئریب

اول آهو گؤزلو گؤرخورام منی خطایه سالا

کی ، فیتنه سیله چوخ عاشیقلری گودازه وئریب

اَییلدی سجده یه ، محراب گؤردو قاشلارینی

اودور کی ، اهل ریا مئیلینی نمازه وئریب

گولردی قیرخ گوزل عشقیله ، آغلایاردی خزر

همین او ذوق صفانی کره آرازه وئریب

جمال یوسیفه جاه و جلال محموده

کمالی معرفتی سرّی وار ایازه وئریب

گوزللیک عالمینین شهریاری دیر بو پری

بونا بو سلطنت حسنی ایندی تازه وئریب

بو فخریمیز بیزه واحد بؤیوک سعادتدیر

زمانه ، ثروت آغیر یوکدور ، آنلامازه وئریب

صبر ايله كونول محنت هجرانه تلسمه

    درد اهلي يئتر صبر ايئله درمانه تلسمه

    يـــوسف ده زليخاني محبت له سويردي

بیلسن سنه، ای گول، نه قدر حـؤرمتیمیـز وار
بیر گون یئته ریک وصلـه،ا گـر قسمتیمیـز وار
هئچ کیمسه بـو نـاز ایلـه سنـی بسلـه یـه بیلمـز
خوشدور، سنه قارشی نه قدر زحمتیمیـز وار
بیـز نئیلـه ییـریـک جنّتـی، یـا بـاغ ِ بهشتــی؟
اؤز باغیمیز، اؤز سولمایاجاق جنّتمتیمیز وار
بولبول ده بیزیم، گول ده بیزیم، ائل ده بیزیمدیـر
کیمدن، گؤزه لیم، ایندی بیزیم منّتمتیمیز وار
قورخما، بیزی هئچ قووه پریشـان ائـده بیلمـز
زولفون سایی، بیل، عشقده جمعیتیمیـز وار
داغلار حرکت ائتسه ده، حتـی بیـزه قـارشـی
دفع ائتمگه عـاجیـز دئییلیـک، همتیمیـز وار
قـووتلـی طبیعـت ده بیـزه بـاش اه ییـر اینــدی
عشق اهلییک، هر یئرده بیزیم قـدرتیمیـز وار
قـدرتلـی ظفـر بـایـراغـی پــارلار الیمیــزده
آزاده لیکـه، صلحـه بـؤیـوک رغبمتیمیـز وار
بیز فخر ائله سک، حاقلییق انسانلیغـا، واحـد
خـالقـا، وطنـه بیـر بـو قـدر خـدمتیمیـز وار

علی آقا واحد

بیوفالیق گورمیشم بیر آی پارادن کوسمیشم

نازینی چوخ چکمشم بیر ناز سارادن کوسمیشم

سویلدیم مندن آرا گزمه نگاریم مندن اول

سایمادی یاریم منی مندن آرادن کوسمیشم

گوزلری عشقی سالیبدور شعله ی آهه منی

بو اوتا یاننام ولی من گوز آلادن کوسمیشم

زلفینین رنگی کیمی گوندوزلریم اولدی قارا

شام تار اولدی گونیم زلفی قارادن کوسمیشم

سویلدی قلبیم سینیب گل مرهم اول سن ای "امید"

مرهم اولدیم بیلمدی قلبی یارادن کوسمیشم

او سر زولفووه مشّاطه، پری شانه ویرار

چوخ ستمگردی پریشانی پریشانه ویرار

گؤرورم قتلیمه آماده دی جلاد گؤزون

تُرک بد مست تک، ال خنجر برّانه ویرار

حلقه زولف گره گیری ده باغلاندی کؤنول

اؤز اؤزون گؤر نئجه زنجیره بو دیوانه ویرار

لوح رخساریوی دوتموش او خطا کار خطون

قویما بیگانه الین سیب زنخدانه ویرار

آلمیسان یانوه گؤردوم گئجه رؤیادا منی

اؤزوم اؤز بختیمی بوللم، بو یوخی یانه ویرار!

لبلرون فکری منه قوت دل اولسا نه عجب

طعنه یاقوت لبون لعل بدخشانه ویرار

شیخ صنعان کیمی هرکیمسه سنی گؤردی دئدی:

عاقبت رخنه بو ترسا بچه ایمانه ویرار

ناوک غمزون ایچر قانیمی ای قاشی کمان

چشم مستون کیمی مخموردو، پیمانه ویرار

یانارام آتش هجرانووه باک ائیلمرم

شعله ی شمعه اؤزون رسمدی پروانه ویرار

زاهدون کفرینه عشقیم وئری فتوای صریح

کافر عشقه باخون، طعنه مسلمانه ویرار!

وار امیدیم سالا صراف اله بیر سرمایه

سکه عشقی ز بس نقد دل و جانه ویرار

صراف

چشم سیه یار دل پیر ایلن اوینار

آهوی خطا دیدیه باخ شیر ایلن اوینار

سالمیش اوزه تک خالینی یاندیرسین حریفی

لیلاج دغل بازدی تدبیر ایلن اوینار

آئینه ده اؤز عکسینه یاریم اولوب عاشیق

صورتگره باخ چکدیگی تصویر ایلن اوینار

صبریم کسیلیر عُمر آزالیر محنتیم آرتار

فوج مژه تا غمزه، پی پیر ایلن اوینار

روحیم اوچار از بس کی سیزیلدار دلِ زاریم

مطرب کیمی دستگاه بم و زیر ایلن اوینار

اویناتماغا یوخ زولفون اگر اولما مکدّر

دیوانه اولان حلقه ی زنجیر ایلن اوینار

مستانه گؤزون اوینادا قاش، ائتمه ملامت

میخانه ده هر کیم قالا شمشیر ایلن اوینار

تؤک خنجر ناز ایله قیزیل قانیمی، دورما

صیاد هاچان توتدوغو نخجیر ایلن اوینار؟

چوخ ائیلمه پیچ و خم و دستاریله بازی

قورخام دیه لر فتنه دی تزویر ایلن اوینار

اوینار تب عشق ایله وجودوم گئجه گوندوز

صراف دی گویا غم اکسیر ایلن اوینار

صراف